ციხისფერდი

ციხისფერდი ოზურგეთის მუნიციპალიტეტის სოფელია, გურიანთის თემში. ის მდინარე სკურდუმის მარჯვნივ მდებარეობს, ზღვის დონიდან 80 მეტრზე, ოზურგეთიდან 7 კილომეტრში. სოფელში ოზურგეთი-ურეკის საავტომობილო გზა და ნატანები-ოზურგეთის სარკინიგზო ხაზი გადის; არის რკინიგზის ბაქანი და საჯარო სკოლა.

ციხისფერდში, ერთ-ერთ პატარა კლდეზე ზღვის ნიჟარები აღმოჩენილია, რაც ადასტურებს, რომ მრავალი საუკუნის წინ აქ ზღვა იყო. სოფლის ძველი სახელწოდება ციხეა. გვიან ფეოდალურ ხანაში ის ნაკაშიძეების სამფლობელოს წარმოადგენდა და მათი საზაფხულო რეზიდენცია იყო. XVII საუკუნის დასაწყისში მამია II გურიელმა ციხე ააშენა, რომელიც შემდგომ ნაკაშიძეთა ხელში გადავიდა; იმავე საუკუნეში მამუკა ნაკაშიძემ ციხის ღვთისმშობლის სახელობის ეკლესია ააშენებინა და მოახატინა. XVII საუკუნეში ბეჟან ნაკაშიძისა და მისი მემკვიდრე გიორგის ბრძანებით მღვდელმა საბამ დაწერა „ციხის გულანი“, იგივე „გურიანთული გულანი“. 1720 წელს ბეჟან ნაკაშიძემ ეკლესიას გარდამოხსნა შესწირა.

1817 წელს მამია V გურიელმა რუსეთის ჯარის დახმარებით ციხე დაუნგრია ნაკაშიძეს და ამის შემდეგ რუსეთის იმპერიის ჯარი — ორასი ჯარისკაცი და ერთი ზარბაზანი — აქ დაბანაკდა. 1873 წელს დიმიტრი ბაქრაძემ ეკლესიაში მამუკა ნაკაშიძისა და მისი ოჯახის ფრესკები ნახა. 1907 წელს ციხის ეკლესიის სიძველეები ექვთიმე თაყაიშვილმა აღწერა. 1908 წელს ეკლესია გაქურდეს და რამდენიმე ხატი და სხვადასხვა ნივთი წაიღეს. 1911 წლიდან სოფელი ციხისფერდის სახელით იხსენიება. 1912 წელს სოფელში საკრედიტო ამხანაგობა გაიხსნა, რომელშიც 1500 ადამიანი იყო გაწევრებული, და ბიბლიოთეკა.

სოფლის სასაფლაოს ტერიტორიაზე, მთის ძირში, რომლის წვერზეც ციხეა განლაგებული, გამოქვაბულია: კლდეში გამოკვეთილი ოთახი თაროვანი ჭერით, რომლის იატაკის ცენტრალურ ნაწილში სწორკუთხედის ფორმის ორმოა ამოკვეთილი.

2014 წლის აღწერით ციხისფერდში 610 მცხოვრები იყო — 302 მამაკაცი და 308 ქალი; ქართველები მოსახლეობის 99,3%-ს შეადგენდნენ, უკრაინელები 0,3%-ს, აფხაზები 0,2%-ს.