ქვემო ნაგვაზავო

ოდიშის ვაკეზე, მდინარე აბაშის მარცხენა სანაპიროზე, ზღვის დონიდან 140 მეტრზე მდებარეობს; კლიმატი ნოტიო სუბტროპიკულია. მარტვილიდან 5 კილომეტრითაა დაშორებული, ზუგდიდიდან — 80, თბილისიდან — 279 კილომეტრით; უახლოესი პორტი, ფოთი, 70 კილომეტრზეა, უახლოესი რკინიგზის სადგური, აბაშა, 29 კილომეტრზე, ქუთაისის საერთაშორისო აეროპორტი კი 40 კილომეტრზე.

სოფლის უბნებს ეჯღარკე (ცენტრში), ეცერცვე (ჩრდილოეთით), ეგვაზე (აღმოსავლეთით) და კაჟონა (სამხრეთ-აღმოსავლეთით) ჰქვია; დასავლეთით ჭალეა — გაკაფული საყანური.

სოფელში საჯარო სკოლაა. აქ დაიბადა პოეტი ნოშრევან ჯიშკარიანი.

დღეს სოფელში ჯღარკავების, გვაზავების, ცერცვაძეების, სილაგავების, თოშხუების, ფუტკარაძეების, მანტუების და ძიძიგურების გვარები ცხოვრობს.

საბჭოთა პერიოდში მესიმინდეობა და მეჩაიეობა იყო განვითარებული. ახლა სოფლის მეურნეობის ძირითადი დარგებია მემარცვლეობა და მეცხოველეობა: სიმინდი, სოიო და ლობიო, მრავალწლიანი ნარგავებიდან კი თხილი და სუბტროპიკული ხურმა.

სოფლის მოსახლეობა მთლიანად ქართველია.

2002 წლის აღწერით სოფელში 1 024 მცხოვრები იყო — 488 მამაკაცი და 536 ქალი. 2014 წლის აღწერით სოფელში 734 ადამიანი ცხოვრობდა — 357 მამაკაცი და 377 ქალი.